Të dhënat zyrtare nga Ministria e Financave tregojnë se për vitin 2025, në zërin e investimeve nga fondet e huaja, realizimi nga Plani i Rritjes i Bashkimit Europian shënoi zero, pavarësisht planifikimit të 700 milionë lekëve (7 milionë euro).
Këto fonde lidhen me zbatimin e reformave specifike në sundimin e ligjit, prokurime dhe administratë. Bashkimi Europian nuk i alokon fondet nëse Shqipëria nuk përmbush hapat e kërkuar dhe nuk përgatit studime fizibiliteti sipas standardeve të nevojshme.
Plani i Rritjes për Ballkanin Perëndimor 2024-2027 parashikon për Shqipërinë 922.1 milionë euro në formë granteve të pakthyeshme dhe huash me kushte të favorshme. Deri tani, Shqipëria ka përfituar 163.8 milionë euro, që përfaqësojnë 17.7% të totalit.
Rreth 758 milionë euro mbeten për t’u disbursuar gjatë 2025-2027, varësisht nga ecuria e reformave dhe përmbushja e objektivave të vendosura nga Bashkimi Europian. Analiza e Drejtorisë së Zgjerimit në BE për "Fondet e BE-së në Shqipëri" e vitit 2025 konfirmon këto shifra.
Në sektorin e energjisë, nga një plan prej 2 miliardë lekësh nga financimi i huaj, nuk u alokua asnjë lekë.