Një ngjarje e pazakontë është raportuar pas përfundimit të një turneu ndërkombëtar futbolli për të rinj në Goteborg të Suedisë, ku një ekip etiopian është larguar pa lënë gjurmë. Në këtë turne morën pjesë përfaqësuese nga 77 shtete, ndërsa nga Etiopia ishin të pranishme katër skuadra.
Sipas raportimeve, largimi i grupit u vërejt ditën e finales, kur organizatorët konstatuan se 20 lojtarët, të moshës 14-17 vjeç, së bashku me shoqëruesit e tyre të rritur, ishin larguar nga ambientet e qëndrimit. Ekipi nuk u kthye në aeroport për fluturimin e planifikuar dhe nuk bëri regjistrimin e largimit nga hoteli. Edhe pse kanë kaluar dhjetë ditë nga mbyllja e aktivitetit, vendndodhja e tyre mbetet e panjohur.
Autoritetet lokale kanë marrë një raport nga organizatorët dhe po zhvillojnë hetime. Vlerësimet paraprake të policisë suedeze sugjerojnë se largimi është bërë me dëshirën e vetë pjesëtarëve të grupit, duke e trajtuar ngjarjen si një rast të mundshëm të migrimit të paligjshëm vullnetar. Zyrtarët e turneut bënë me dije se komunikimi i fundit i marrë nga pala etiopiane përmbante një mesazh falënderimi për bashkëpunimin dhe justifikimin për “probleme komunikimi”, por pa dhënë detaje mbi kthimin në Etiopi ose vendndodhjen e tyre.
Në lidhje me këtë situatë, Federata Etiopiane e Futbollit (EFF) ka reaguar publikisht për të sqaruar se skuadra e përfshirë në këtë incident nuk ka qenë pjesë e ekipit kombëtar të Etiopisë. Federata shprehu keqardhje për raportimet e zhdukjes së lojtarëve të rinj.
Përditësime
Autoritetet suedeze konfirmuan se 20 futbollistë nga Etiopia nuk janë kthyer në vendlindje pas përfundimit të turneut në Suedi. Burime zyrtare bëjnë të ditur se largimi i tyre nga kampi ishte i qëllimtë, me qëllim kërkimin e kushteve më të mira të jetesës. Lojtarët e kanë argumentuar qëndrimin e tyre të parregullt me vështirësitë e rënda ekonomike dhe sociale në vendin e origjinës.