Një 20-vjeçar shqiptar, Elion Veseli me prejardhje nga Mitrovica, u vra të shtunën mbrëma në qendër të qytetit Kristianstad të Suedisë. Ai u plagos rëndë me thikë gjatë një përleshjeje dhe u dërgua me urgjencë në spital, ku nuk arriti të mbijetojë plagëve.
Policia suedeze arrestoi tre persona rreth moshës 25-vjeçare të dyshuar për vrasje. Hetimet paraprake tregojnë se ngjarja lidhet me një konflikt të vjetër mes dy familjeve shqiptare, i nisur në vitin 2011 gjatë një turneu futbolli për fëmijë.
Konflikti filloi me një përplasje mes dy djemve 12-vjeçarë, çka çoi në përleshje mes prindërve. Në atë rast morën pjesë rreth 30 persona, ndërsa dy burra dhe dy gra u hetuan për dhunë fizike, por çështja nuk përfundoi në gjyq. Tensionet vazhduan ndër vite me incidente të tjera.
Elion Veseli ishte vëllai i njërit prej djemve të përfshirë në konfliktin e 2011-s, ndërsa një nga të arrestuarit dyshohet se i përket familjes tjetër. Mediat suedeze, si Bulletin, raportojnë se hasmëritë mes familjeve shqiptare janë fenomen i njohur, por nuk tregojnë për familje kriminale. Disa persona të përfshirë figurojnë në databazën juridike Verifiera, kryesisht për vepra të lehta penale, me përjashtime si babai i njërit djalë.
Policia dhe Prokuroria suedeze po vazhdojnë hetimet. Familja e viktimës nuk ka njoftuar ende për ceremoninë mortore dhe nuk dihet nëse ai do të varroset në Kosovë apo në Suedi.