Ngjarja tragjike ndodhi të dielën, rreth orës 21:00, në zonën Kvarngärdet në Uppsala të Suedisë. Viktima, Gent (Milot) Maksutaj, me origjinë nga fshati Banjë i Istogut, u qëllua për vdekje gjatë një sulmi me armë zjarri.
Familjarët e viktimës, përmes reagimeve në rrjetet sociale, kanë pohuar se Maksutaj nuk kishte asnjë lidhje me konfliktin dhe dyshohet se është vrarë gabimisht si kalimtar i rastit. Babai i tij, Tahir Maksutaj, ka shprehur dhimbjen e thellë përmes një mesazhi në rrjetet sociale, duke theksuar se jeta e të birit iu mor nga veprimet e bandave kriminale.
Autoritetet policore suedeze mbërritën në vendngjarje pas njoftimit për të shtënat dhe nisën një hetim intensiv. Sipas informacioneve, një person rreth 18-vjeç është ndaluar në orët e para të mëngjesit të së hënës si i dyshuar për përfshirje në këtë ngjarje. Policia po vijon punën për analizimin e pamjeve të kamerave të sigurisë dhe marrjen në pyetje të dëshmitarëve, ndërsa ende nuk ka një konfirmim zyrtar mbi motivet e sakta të krimit, pavarësisht dyshimeve se ai mund të jetë pasojë e përplasjeve mes grupeve kriminale.