Një ngjarje e rëndë është regjistruar paraditen e së dielës në fshatin Kobaj të Prizrenit. Sipas njoftimit zyrtar nga Policia e Kosovës, një konflikt mes disa kushërinjve ka degjeneruar në dhunë fizike, ku janë përdorur mjete të forta dhe një mjet i mprehtë (thikë).
Si pasojë e dëmtimeve të marra, një 27-vjeçar ka ndërruar jetë, ndërsa babai i tij, 57 vjeç, ka mbetur i plagosur dhe është dërguar për trajtim mjekësor. Zëdhënësi i policisë për rajonin e Prizrenit, Shaqir Bytyqi, konfirmoi se përleshja ka ndodhur rreth orës 11:50.
Menjëherë pas raportimit, forcat e rendit kanë mbërritur në vendin e ngjarjes për të kryer veprimet e para hetimore. Personat e dyshuar dhe familjarët e përfshirë në konflikt janë shoqëruar në Stacionin Policor në Prizren për t’u marrë në pyetje. Autoritetet po punojnë në bashkëpunim me prokurorinë për të përcaktuar motivet dhe dinamikën e plotë të këtij konflikti familjar.