Një përleshje fizike mes dy familjeve në fshatin Kobaj të Prizrenit ka përfunduar tragjikisht, duke lënë të vdekur një 27-vjeçar. Përveç viktimës, lëndime serioze ka marrë edhe babai i tij, 57 vjeç, i cili po trajtohet në Spitalin Rajonal të Prizrenit.
Mjeku kujdestar në Emergjencën e Prizrenit, Kujtim Kryeziu, njoftoi se 27-vjeçari mbërriti në spital rreth orës 12:00 me plagë të rënda në regjionin e gjoksit. Sipas mjekut, goditja dyshohet se ka prekur zemrën, duke e bërë të pamundur reanimimin.
Në lidhje me 57-vjeçarin, mjeku konfirmoi se ai ka marrë lëndim në pjesën e majtë të gjoksit, por pa prekur organet vitale. Pas intervenimit kirurgjik, pacienti është pranuar në repartin e Kirurgjisë, ku vazhdon të mjekohet në gjendje stabile.
Autoritetet kompetente po hetojnë rrethanat e plota të kësaj ngjarjeje. Deri në këto momente, motivet që çuan në këtë përleshje mes dy familjeve mbeten të paqarta.