Një ngjarje e rëndë ka ndodhur të dielën në fshatin Kobaj të Prizrenit, ku një konflikt fizik mes dy familjeve, të cilat janë kushërinj mes vete, ka përfunduar me vrasjen e një personi.
Zëdhënësi i Polisisë së Kosovës për rajonin e Prizrenit, Shaqir Bytyqi, ka njoftuar se rasti është raportuar rreth orës 11:50. Nga përleshja, ku dyshohet se është përdorur thikë si mjet i mprehtë, një 27-vjeçar ka humbur jetën, ndërsa babai i tij 57-vjeçar ka pësuar lëndime të rënda dhe ndodhet në spital.
Kryeprokurori i Prizrenit, Petrit Kryeziu, ka deklaruar se hetuesit policorë, ekspertët e forenzikës dhe prokurori i shtetit kanë mbërritur në vendin e ngjarjes për të kryer veprimet procedurale. Personat e dyshuar si dhe familjarët e përfshirë në konflikt janë shoqëruar në Stacionin Policor në Prizren për t'u marrë në pyetje.
Policia ka ndërmarrë masa shtesë të sigurisë në zonë për të garantuar rendin publik, ndërsa hetimet po zhvillohen në bashkëpunim të ngushtë me Prokurorinë e Shtetit për të zbardhur shkaqet që çuan në këtë tragjedi.