Një grua 38-vjeçare shqiptare, nënë e katër fëmijëve, u gjet e pajetë mbrëmjen e së dielës në oborrin e një shtëpie në Sooß, komunë e vogël pranë qytetit Baden në Austri.
Para mbërritjes së policisë, një burrë telefonoi qendrën e emergjencës duke njoftuar se kishte ndodhur një vrasje. Kur forcat e rendit arritën në vendngjarje, gruaja ishte shtrirë pa shenja jete në bar, ndërsa në tokë u vunë re gjurmë zvarritjeje. Bashkëshorti i saj ndodhej aty dhe dukej emocionalisht i prekur.
Autoritetet e kanë cilësuar rastin si femicid. I dyshuari kryesor është David O., shtetas austriak me prejardhje nga komuna e Gjakovës në Kosovë. Ai fillimisht mohoi përfshirjen, por më pas pranoi para hetuesve se nuk e kishte kapërcyer ndarjen e çiftit në vitin 2019 dhe e fajësoi gruan për vendimin. Thuhet se ai deklaroi: "E urrej atë!"
Viktima kishte plagë në kokë dhe lëndime të tjera, të cilat dyshohet të jenë shkaktuar nga thika, arma e zjarri dhe mjete të forta. Policia sekuistroi një pistoletë 9 milimetra, të cilën i dyshuari tha se e kishte blerë nga një person i panjohur, si dhe një kaçavidë.
Autoritetet theksojnë se për David O. vlen ende prezumimi i pafajësisë derisa të përfundojnë hetimet. Në Sooß, ku jetojnë rreth 1.000 banorë, familja ishte e njohur. Banorët e përshkruajnë viktimën si grua të hapur, të dashur dhe shumë pozitive.