Pas denoncimit të familjarëve më 5 qershor 2026 për humbjen e kontakteve me Eglant Koçin, autoritetet policore kanë intensifikuar hetimet duke zbardhur rrethanat e ngjarjes. Sipas hetimeve paraprake, 34-vjeçari dyshohet se është rrëmbyer nga Armand Shakaj, 41 vjeç, i cili aktualisht është shpallur në kërkim. Policia ka gjetur motomjetin e të riut, të cilin autori e kishte lëvizur nga vendi i parkimit, si dhe automjetin tjetër të përdorur për transportimin e tij.
Në pranga ka rënë Enea Zyferi, 25 vjeç, i punësuar si kamerier në lokalin në pronësi të Shakajt. Ai akuzohet për veprën penale të “Përkrahjes së autorit të krimit”, pasi dyshohet se ka ndihmuar 41-vjeçarin pas ngjarjes. Pavarësisht kontrolleve të imtësishme në ambientet ku dyshohet se u mbajt peng 34-vjeçari, trupi i tij nuk është gjetur ende.
Sipas informacioneve nga kamerat e sigurisë, Koçi është parë për herë të fundit më 4 qershor, teksa lëvizte në drejtim të një lokali në Bulevardin Zhan D’Ark. Hetuesit po shqyrtojnë disa pista, përfshirë përfshirjen e mundshme të viktimës në aktivitete që lidhen me kriptomonedhat. Operacionet për lokalizimin e të shpallurit në kërkim dhe zbardhjen e fatit të 34-vjeçarit vazhdojnë.