Autoritetet policore kanë gjetur një trup të pajetë në një zonë malore në fshatin Cerujë, pas kërkimeve intensive të kryera me dronë. Trupi, i gjetur në proces dekompozimi, është dërguar për ekspertizë mjeko-ligjore për identifikimin përfundimtar, ndonëse dyshohet se i përket Eglant Koçit, i cili ishte denoncuar si i zhdukur nga familjarët më 5 qershor.
Sipas hetimeve, Eglant Koçi ishte parë për herë të fundit më 4 qershor pranë sheshit “Wilson” në Tiranë. Si autor kryesor i dyshuar është shpallur 41-vjeçari Armand Shakaj. Policia ka sekuestruar një automjet tip Porsche Cayenne, në të cilin janë gjetur gjurmë gjaku; mjeti dyshohet se është përdorur për transportimin e viktimës. Në ambientet e një lokali në pronësi të Shakajt, pranë gjimnazit “Ismail Qemali”, hetuesit kanë gjetur gjurmë të mbetjeve të barutit.
Në pranga ka rënë 25-vjeçari Enea Zyferi, i punësuar në lokalin e Shakajt, i cili u arrestua ndërsa po pastronte automjetin e përdorur nga i dyshuari. Ndërkohë, policia vijon kërkimet për gjetjen e Armand Shakajt, i cili dyshohet se ka ndryshuar gjashtë numra telefoni për t'iu shmangur lokalizimit. Shakaj vuan nga probleme me veshkat, ndaj policia ka njoftuar institucionet shëndetësore për monitorim. Pista kryesore e hetimit lidhet me një mosmarrëveshje për aktivitetin e kriptomonedhave, ku besohet se ka qenë i përfshirë 34-vjeçari Koçi.