Hetimet për vrasjen e Eglant Koçit janë përqendruar te lëvizjet e të dyshuarit Armand Shakaj, i cili vijon të jetë në kërkim. Sipas dosjes hetimore, dyshimet lidhen me mosmarrëveshje rreth portofolëve virtualë dhe aktiviteteve të call center-ave. Në kuadër të verifikimeve, grupi i hetimit ka pyetur administratorin e një subjekti Exchange në Tiranë, i cili ka deklaruar se viktima nuk ishte paraqitur për transferta për më shumë se një muaj, duke hedhur poshtë pretendimet e shprehura më parë nga vetë i dyshuari.
Sipas rindërtimit të ngjarjes, më 4 qershor, Eglant Koçi është filmuar duke vizituar biznesin e Shakajt me motor. Rreth 40 minuta më vonë, një person i veshur me të zeza është larguar nga vendngjarja me motorin e viktimës. Pamjet e datës 5 qershor, ora 23:30, shfaqin Shakajn duke nxjerrë zvarrë nga ambientet një qese në formën e trupit të njeriut, të cilën më pas e ka larguar me automjet. Trupi i viktimës u gjet pas disa ditësh, ndërsa identifikimi u bë përmes analizës së ADN-së.
Prokuroria ka pyetur gjithashtu dy lavazhierë, të cilëve Shakaj u kishte lënë një automjet tip Porsche për pastrim, duke u dhënë porosinë: “Do vij ta marr, vetëm lajeni mirë”. Punëtorët kanë dëshmuar se gjatë procesit të larjes vunë re një lëng të kuq në pjesën e tapetit pas sediljes së shoferit, i cili në pamje të parë ngjante me gjak. Për këtë çështje, në burg vijon të mbahet 25-vjeçari Ena Zyferi, i cili akuzohet se ka ndihmuar autorin duke fikur kamerat e sigurisë.