Autoritetet policore vijojnë kërkimet intensive për zbardhjen e fatit të Eglant Koçit, i cili rezulton i humbur prej datës 4 qershor. Drejtori i Policisë së Qarkut Tiranë, Oliger Torba, konfirmoi se operacioni është përqendruar në zona malore midis Tiranës dhe Elbasanit, ku po marrin pjesë edhe forca nga Kosova me qen të specializuar.
Grupi hetimor dyshon se Koçi është vrarë dhe groposur nga shoku i tij, Armand Shakaj, i cili tashmë është shpallur në kërkim ndërkombëtar. Dyshimet janë forcuar pas sekuestrimit të automjetit luksoz të Shakajt, ku u gjetën vegla pune, përfshirë një lopatë me mbetje balte. Sipas të dhënave paraprake, dyshohet se trupi i viktimës ka qëndruar për më shumë se 24 orë brenda makinës, përpara se autori ta transportonte atë drejt zonës së Ibës me një karrotrec, duke inskenuar një defekt teknik.
Hetimet po shqyrtojnë dy pista kryesore që mund të kenë çuar në konfliktin mes dy personave:
• Debatet për menaxhimin e fitimeve dhe investimeve në kriptomonedha, ku Koçi dyshohet se kishte në portofolin e tij shuma që arrinin deri në 700 mijë euro.
• Aktivitetet e paligjshme të fajdeve, ku Shakaj dyshohet se e mbante përgjegjës Koçin për moskthimin e parave nga persona të tretë, të cilëve u ishin dhënë hua përmes ndërmjetësimit të tij.
Përditësime
Hetuesit kanë identifikuar të dyshuarin kryesor për zhdukjen e Eglant Koçit, i njohur me nofkën 'Mand Dhelpra'. Në kuadër të operacionit, Policia e Shtetit ka sekuestruar në cilësinë e provës materiale automjetin tip Porsche, fotografitë e të cilit janë bërë publike.