Autoritetet hetimore kanë bërë të ditur detaje të reja rreth dinamikës së arratisë së Armand Shakajt, i cili mbetet person në kërkim për vrasjen e 34-vjeçarit Eglant Koçi. Sipas hetimeve, pas krimit të ndodhur më 4 qershor, Shakaj është fshehur për rreth 10 ditë në zona të ndryshme të qarkut të Elbasanit, përfshirë Peqinin dhe Cërrikun.
Për t'iu shmangur kapjes nga policia, autori ka ndërmarrë masa të sofistikuara, si ndryshimi i pamjes së jashtme, përdorimi i dokumenteve të falsifikuara dhe qëndrimi në apartamente apo hotele me qira ditore. Ai ka shmangur përdorimin e mjeteve personale, duke preferuar lëvizjen me taksi. Ndonëse policia arriti të lokalizonte sinjalin e celularit të tij në Elbasan, Shakaj është larguar pak përpara ndërhyrjes së forcave të rendit. Gjatë kësaj periudhe, ai dyshohet se ka përdorur 6 numra të ndryshëm telefoni.
Trupi i viktimës Eglant Koçi u gjet nga policia pas dy javësh kërkime, i braktisur në Majën e Korrës (1450 metra lartësi) në fshatin Cerrujë. Në vijim të hetimeve, ekspertët kanë gjetur njolla gjaku në automjetin që dyshohet se është përdorur për transportimin e trupit, si dhe kanë gjetur motorin e viktimës pranë zonës së "5 Majit" në Tiranë.
Hetimet paraprake, të mbështetura nga analiza e kompjuterëve të sekuestruar në zyrat e autorit, kanë nxjerrë në pah lidhje me investime në kriptomonedha, aktivitet ku dyshohet se ishte i përfshirë edhe viktima. Si pjesë e hetimeve, policia ka vënë në pranga Enea Zyferin, punonjës në lokalin e Shakajt, me akuzën për përkrahje të autorit të krimit. Autoritetet dyshojnë se Shakaj vazhdon të ndihmohet nga persona të afërt për t'iu shmangur drejtësisë.