Ngjarja e rëndë ndodhi më 4 qershor, kur Armand Shakaj ekzekutoi me armë zjarri Eglant Koçin brenda zyrave dhe lokalit të këtij të fundit, pranë shkollës “Ismail Qemali” në Tiranë. Një ditë më pas, më 5 qershor, autori organizoi zhdukjen e trupit të pajetë.
Sipas hetimeve, Shakaj transportoi trupin me automjetin e tij tip “Porsche”, të cilin fillimisht e dërgoi me karrotrec deri në fshatin Ibë, duke pretenduar para drejtuesit të mjetit se po e dërgonte për riparim në servis. Më pas, ai udhëtoi në drejtim të fshatit Cërrujë, duke ndjekur një itinerar malor përmes fshatrave Mollagjesh dhe Funar.
Udhëtimi drejt destinacionit final, Majës së Korrës, zgjati rreth 3 orë e 30 minuta në një terren të thyer malor. Shakaj dyshohet se e njihte mirë zonën për shkak të pasionit të tij për motoçikletat. Pasi arriti në pikën e lartë, ai hodhi trupin e viktimës në një zonë të pyllëzuar.
Zbulimi i krimit u bë i mundur falë punës së policisë, e cila përdori teknologjinë IMSI Catcher për të gjurmuar sinjalin e celularit të autorit. Gjithashtu, informacionet e mbledhura në rrugë operative, përfshirë dëshmitë e barinjve të zonës që kishin vënë re lëvizjen e makinës në itinerarin malor, ndihmuan në zbardhjen e ngjarjes.