Policia e Tiranës ka intensifikuar operacionet e kërkimit në zonat malore të kryeqytetit për gjetjen e Eglant Koçit, i cili është raportuar i zhdukur prej datës 4 qershor. Hetimet janë përqendruar në zonat e Pëllumbasit dhe Qafë Mollës, vende që dyshohet se vizitoheshin shpesh nga i dyshuari kryesor, Armand Shakaj.
Sipas informacioneve nga grupi hetimor, banorë të zonës kanë raportuar se kanë parë mjetin e Shakajt, çka ka shtyrë autoritetet të shtrijnë kontrollet në këtë perimetër. Të dhënat nga sistemi TIMS tregojnë se 41-vjeçari nuk është larguar jashtë kufijve të vendit, duke përforcuar dyshimet se ai po fshihet brenda territorit shqiptar.
Grupi hetimor ka konstatuar se Armand Shakaj vuan nga një problem shëndetësor. Për këtë arsye, Policia ka njoftuar spitalet publike dhe ato private, duke kërkuar bashkëpunim në rast se i dyshuari paraqitet për të kërkuar ndihmë mjekësore. Ndërkohë, Gjykata e Tiranës ka vendosur masën e sigurisë "arrest me burg" për Enea Zyferin, kamarierin e lokalit në pronësi të Shakajt, i cili ka mohuar çdo lidhje me ngjarjen.
Hetuesit dyshojnë se 34-vjeçari Eglant Koçi mund të jetë vrarë, bazuar në provat rrethanore dhe shkencore të mbledhura deri më tani. Viktima ishte parë për herë të fundit pranë sheshit Willson, ndërsa udhëtonte me motorin e tij me targa CT969.