Instituti i Mjekësisë Ligjore ka konfirmuar me saktësi 100% se trupi i gjetur pak ditë më parë në zonën malore të Cërrunjës, në kufirin mes Tiranës dhe Elbasanit, i përket 34-vjeçarit Eglant Koçi. Identifikimi u realizua përmes krahasimit të profilit gjenetik të viktimës me atë të nënës së tij.
Eglant Koçi u pa për herë të fundit më 4 qershor në zonën e sheshit “Wilson” në Tiranë. Zhdukja e tij u denoncua nga familjarët më 5 qershor. Gjatë hetimeve, policia gjeti motomjetin e të ndjerit pranë zonës së “5 Majit”. Trupi u gjet pas dy javësh kërkime intensive nga forcat e policisë, të mbështetura nga forcat e sigurisë së Kosovës dhe përdorimi i dronëve.
Sipas hetimeve të deritanishme, dyshohet se 34-vjeçari është vrarë me armë zjarri nga miku i tij, 41-vjeçari Armand Shakaj, i njohur edhe me nofkën “Mand Dhelpra”. Hetuesit dyshojnë se autori e ka transportuar trupin e viktimës drejt zonës së Cërrunjës pas krimit. Aktualisht, Armand Shakaj vijon të jetë në kërkim nga autoritetet, ndërsa po kryhen verifikime për të zbardhur nëse ai ka pasur ndihmën e personave të tjerë në këtë ngjarje.
Përditësime
Hetimet për vrasjen e Eglant Koçit, trupi i të cilit u identifikua përmes ADN-së në Cërrunjë, kanë zbardhur dinamikën e krimit. Viktima është ekzekutuar me një plumb në kokë. Policia ka arrestuar në flagrancë Enea Zyferin, në rolin e bashkëpunëtorit për pastrimin e automjetit të përdorur në krim. Hetimet po përqendrohen në dy pista kryesore: konfliktet për fajde dhe transaksionet me kriptomonedha. Autori ka tentuar të asgjësojë provat duke transportuar trupin me karrotrec, i futur në qese të zeza, dhe duke përdorur numra të ndryshëm telefoni për t'iu shmangur gjurmimit.