Pas një operacioni kërkimi që zgjati dy javë, është bërë i mundur lokalizimi i trupit të pajetë të Eglant Koçit në fshatin Cerrujë. Gjetja e trupit u realizua me ndihmën e dronëve të policisë, ndërsa identifikimi zyrtar u krye nga familjarët e të ndjerit. Trupi u gjet në gjendje të avancuar të dekompozimit.
Sipas të dhënave paraprake nga këqyrja e vendit të ngjarjes, në pjesën e pasme të kokës është konstatuar një plagë tejshpuese, e cila dyshohet se është shkaktuar nga përdorimi i një arme zjarri. Trupi është dërguar në morg, ku do t'i nënshtrohet një ekspertize të detajuar mjeko-ligjore për të përcaktuar shkaqet e sakta të vdekjes.
Në lidhje me këtë ngjarje, autoritetet policore kanë shpallur në kërkim shokun e ngushtë të viktimës, Armand Shakaj. Hetimet për zbardhjen e rrethanave të plota vijojnë, ndërsa pritet që rezultatet e ekspertizës mjeko-ligjore të japin më shumë qartësi mbi dinamikën e ngjarjes.