Trupi i pajetë i 34-vjeçarit Eglant Koçi është lokalizuar ditën e sotme pas dy javë kërkimesh intensive. Gjetja e tij është bërë e mundur falë përdorimit të dronëve të Policisë së Shtetit, të cilët identifikuan trupin në një humnerë në fshatin Cerujë, në një zonë rurale ndërmjet Tiranës dhe Elbasanit.
Sipas hetimeve paraprake, ngjarja dyshohet se ka ndodhur pas mbajtjes peng të viktimës nga miku i tij, Armand Shakaj, i cili aktualisht është shpallur në kërkim nga policia. Pamjet e kamerave të sigurisë kanë dokumentuar të dyshuarin duke transportuar sende të dyshimta brenda qeseve të zeza në mjetin e tij tip Porsche, ku dyshohet se është mbajtur trupi për rreth 24 orë. Për të fshehur gjurmët, Shakaj raportohet se ka përdorur një karrotrec për të zhvendosur mjetin deri në Ibë, me pretendimin se automjeti kishte pësuar defekt.
Në lidhje me këtë rast është arrestuar Enea Zyferi, kamarieri i lokalit të të dyshuarit, i cili akuzohet se ka dërguar mjetin në lavazh pas ngjarjes. Gjatë kontrollit të makinës, hetuesit kanë gjetur gjurmë gjaku dhe vegla pune, si lopata me baltë, të cilat janë sekuestruar në cilësinë e provës materiale. Aktualisht, grupi hetimor dhe forcat e RENEA-s janë në terren për operacionin e nxjerrjes së trupit nga humnera.