Trupi i një personi të seksit mashkull, në proces dekompozimi, është zbuluar në fshatin Cërrujë, lagjja Domush. Sipas njoftimit zyrtar të Policisë së Shtetit, shërbimet policore dhe grupi hetimor, nën drejtimin e Prokurorisë, po vijojnë veprimet procedurale për identifikimin zyrtar të viktimës dhe zbardhjen e rrethanave të ngjarjes.
Sipas informacioneve paraprake, trupi dyshohet se i përket Eglant Koçit, për të cilin ishte denoncuar zhdukja dy javë më parë. Burime bëjnë me dije se viktima ishte hedhur në një humnerë, ndërsa vendndodhja e tij është bërë e mundur përmes përdorimit të një droni të policisë. Gjithashtu, raportohet se si autor i dyshuar për ngjarjen është shtetasi Armand Shakja.
Përditësime
Familjarët kanë identifikuar zyrtarisht viktimën si Eglant Koçi. Ekspertiza mjeko-ligjore konfirmoi se vdekja është shkaktuar nga një plagë tejshpuese me armë zjarri në kokë. Trupi ndodhet në morg për autopsi, ndërsa në zyrën e të dyshuarit, Armand Shakaj, hetuesit gjetën gjurmë baruti dhe një shenjë predhe në mur.