Seanca plenare e Kuvendit të Shqipërisë më 3 shkurt 2026 ka nisur me debate rreth projektvendimit për ndryshimet në Komisionin e Posaçëm të Reformës Territoriale, të futur në pikën 13 të rendit të ditës.
Deputetja e Partisë Demokratike, Ina Zhupa, kërkoi nga mazhoranca socialiste të tërheqë projektvendimin. Ajo argumentoi se çështja nuk është votuar as pro, as kundër në Konferencën e Kryetarëve, ku ishte marrë vendim për shtyrje dhe diskutim të mëtejshëm. Zhupa kujtoi se Parlamenti ka miratuar bashkëkryesim të barabartë midis PD-së dhe PS-së, me nga një bashkëkryetar nga secila forcë politike, i cili duhet të bashkërendojë mbledhjet.
"Diçka e pavotuar në Konferencën e Kryetarëve nuk mund të futet për votim", tha ajo, duke akuzuar PS-në se synon të imponohet mbi PD-në dhe të përsërisë dështimin e reformës së vitit 2014, pasojat e së cilës i vuajnë qytetarët. PD-ja, sipas Zhupës, është e gatshme të respektojë vendimin parlamentar për anëtarësi të barabartë dhe vendimmarrje me ekspertë dhe ndihmë ndërkombëtare.
Përgjigjet e mazhorancës dhe opozitës
Deputeti socialist Petrit Spahiu u përgjigj se vendimet merren në Kuvend, jo në Konferencë. Ai shpjegoi se projektvendimi erdhi për shkak të mos pjesëmarrjes së deputetëve të PD-së në mbledhjen e së hënës në komision, në kuadër të bojkotit të tyre, çka prishi bashkëdrejtimin dhe i kaloi shumicën PS-së. Sipas marrëveshjes në Konferencë, nëse PD-ja do të kishte marrë pjesë, ky projekt nuk do të futej në rend.
Deputeti i PD-së Luçiano Boçi akuzoi mazhorancën se reformën e 2014-s e kishte bërë "copë Shqipërinë" dhe se tani synon të marrë shumicën duke zëvendësuar anëtarët me "noterët e tyre". Ai theksoi se opozita ka arsye për të mos marrë pjesë në komisione dhe do të jetë në shesh, por jo me mazhorancën.
Përditësime
Ina Zhupa akuzoi mazhorancën për "ultimatum" dhe shndërrim të komisionit në "noter të mazhorancës". Ajo kërkoi tërheqjen e projektvendimit, angazhimin e ekspertëve dhe KiE-së, si dhe respektim strikt të Kushtetutës.
Luçiano Boçi u konfirmua si bashkëkryetar i Komisionit Territorial. Ai denoncoi "shkelje të procedurave" dhe "tentativën e imponimit të vendimeve pa konsensus".