Një burrë 38-vjeçar ka humbur jetën pas një sulmi nga një peshkaqen i bardhë pranë ishullit turistik Rottnest, në bregdetin jugperëndimor të Australisë.
Sulmi ndodhi të shtunën rreth orës 10:00 lokale në zonën Horseshoe Reef, në veriperëndim të ishullit pranë qytetit të Perthit. Viktima po peshkonte me një mik pranë një shkëmbi koralor kur u sulmua dhe u kafshua në këmbë.
Sipas policisë së Australisë Perëndimore, burri u transportua me varkë një kilometër larg ishullit, por përpjekjet e paramedikëve për ta ringjallur nuk patën sukses. Para sulmit, rojet bregdetare kishin raportuar praninë e një peshkaqeni të bardhë, rreth katër deri pesë metra i gjatë, në zonë.
Departamenti i Industrive Parësore dhe Zhvillimit Rajonal bëri thirrje që publiku të tregojë kujdes të shtuar në ujërat përreth zonës. Ky është sulmi i parë fatal nga peshkaqenët në Australinë Perëndimore që nga marsi i vitit të kaluar.
Australia regjistron mesatarisht më shumë se tre sulme fatale nga peshkaqenët çdo vit.