Një zjarr i përmasave të mëdha ka përfshirë sot kodrat e fshatit Shtërmen, në Bashkinë e Cërrikut, duke rrezikuar një sipërfaqe të konsiderueshme toke.
Në operacionin për shuarjen e flakëve janë angazhuar 21 zjarrfikës dhe janë përdorur 5 mjete. Në ndihmë të forcave lokale kanë mbërritur ekipet nga bashkitë fqinje të Elbasanit, Gramshit dhe Belshit, të cilat iu përgjigjën menjëherë thirrjes për ndihmë dhe kontribuuan në neutralizimin e vatrës së zjarrit.
Pas disa orësh përpjekje, zjarri është vënë nën kontroll dhe është bërë e mundur shuarja e plotë e tij. Bashkia Cërrik u ka bërë thirrje qytetarëve që të njoftojnë menjëherë autoritetet përgjegjëse sapo të konstatojnë vatra të reja zjarri, me qëllim parandalimin e përhapjes së flakëve në zona të tjera.
Përditësime
Kryetari i Bashkisë së Cërrikut, Florenc Doka, njoftoi vënien nën kontroll të zjarrit në Shtërmen. Bashkia vlerësoi kontributin e banorëve dhe forcave zjarrfikëse për ndërhyrjen e shpejtë, ndërsa Doka theksoi rritjen e rrezikut nga zjarret gjatë sezonit veror si pasojë e ndryshimeve klimatike.