Një vatër e madhe zjarri ka përfshirë masivin pyjor në ekonominë pyjore Iballe-Mëzi të bashkisë Fushë-Arrëz. Flakët, të cilat janë vënë re fillimisht mbi lagjen Gere, kanë sjellë angazhimin e banorëve të zonës dhe të punonjësve të shërbimit pyjor, të cilët kanë punuar gjatë gjithë natës me mjete rrethanore për të frenuar përhapjen e zjarrit.
Ndërhyrja e forcave zjarrfikëse të Fushë-Arrëzit ka qenë e pamundur për shkak të relievit të vështirë malor. Për këtë arsye, ekipet janë stacionuar në qendër të Njësisë Administrative, ndërsa operacioni është përshkallëzuar me ndërhyrje nga ajri. Një helikopter i Forcave të Armatosura po punon për shuarjen e flakëve dhe izolimin e perimetrit.
Informacionet paraprake sugjerojnë se vatra e zjarrit ka nisur në një sipërfaqe me bimësi të ulët dhe shkurre. Autoritetet kompetente kanë nisur verifikimet, duke trajtuar si pistë kryesore dyshimin për zjarrvënie të qëllimshme.