Një zjarr i fuqishëm ka përfshirë anijen e mallrave Ocean Melody gjatë paradites së 10 shtatorit në kantierin detar Beihai të qytetit Qingdao, në provincën Shandong të Kinës. Incidenti ndodhi rreth orës 11:15 me kohën lokale, ndërsa anija, e cila lundron nën flamurin e Liberisë, ishte duke iu nënshtruar punimeve të mirëmbajtjes. Sipas të dhënave, anija kishte mbërritur në këtë kantier më 31 gusht.
Në bord ndodheshin gjithsej 42 persona. Sipas raporteve të transmetuesit shtetëror kinez CCTV, flakët u vunë nën kontroll pas rreth tri orësh ndërhyrje nga ekipet e emergjencës. Për ngjarjen ka reaguar presidenti kinez Xi Jinping, i cili ka bërë thirrje për përpjekje maksimale në kërkimin e personave të zhdukur dhe hetimin e menjëhershëm të shkaqeve që çuan në këtë aksident. Po ashtu, kryeministri Li Qiang ka kërkuar angazhim për të shpëtuar personat e bllokuar dhe për të shmangur rrezikun e fatkeqësive dytësore.
Anija Ocean Melody, e ndërtuar 20 vjet më parë dhe me gjatësi 190 metra, operohet nga Yuyangkunpeng Shanghai Shp Mgm dhe është në pronësi të Huili Shipping Co Ltd. Autoritetet vendore kanë mobilizuar burimet e nevojshme për reagimin ndaj incidentit, ndërsa Ministria e Menaxhimit të Emergjencave ka dërguar një ekip mbështetës në vendngjarje.