Autoritetet çeke kanë nisur hetim për zjarrin që shpërtheu më 20 marsit rreth orës 04:00 në një depo të kompanisë LPP Holding në qytetin Pardubice, rreth 100 kilometra në lindje të Pragës. Kompania prodhon dronë, pajisje ushtarake dhe një raketë të re lundruese, e cila planifikohej të testohej në luftimet në Ukrainë gjatë këtij viti. Zyrtarët e kanë cilësuar zjarrin si të qëllimshëm dhe e trajtojnë rastin si sulm terrorist.
Një grup i quajtur Earthquake Faction deklaroi në Telegram se është përgjegjës për ngjarjen, duke e përshkruar objektin si "qendër kyç prodhimi" për armë izraelite dhe të lidhur me atë që e quajti "gjenocid ndaj Palestinës, Iranit dhe Libanit". Pak pas zjarrit, disa gazetarë çekë morën mesazhe nga një adresë e regjistruar në të njëjtin domen me faqen e këtij grupi, sipas shefit të policisë kombëtare Martin Vondrasek.
Mediumi çek Seznam zpravy, duke cituar burime anonime, raporton se zyrtarët e sigurisë po shqyrtojnë edhe mundësinë e një operacioni të rremë. Sipas tij, Earthquake Faction, për të cilin nuk ka të dhëna të verifikueshme, mund të jetë mbulesë për një entitet tjetër ose aktor shtetëror.
Ministri i Brendshëm Lubomír Metnar deklaroi në platformën X se po shqyrtojnë të gjithë informacionin e disponueshëm dhe ekziston lidhje e mundshme me sulm terrorist. Kryeministri Andrej Babiš konfirmoi se ngjarja hetohet si akt terrorizmi, ndërsa presidenti Petr Pavel theksoi nevojën për të pritur rezultatet e hetimit.
Në një deklaratë zyrtare, LPP Holding konfirmoi zjarrin në një nga objektet e saj, por refuzoi të spekulojë mbi shkaktarët apo rrethanat. Kompania shtoi se askush nuk u lëndua gjatë ngjarjes.