Një zjarr ka përfshirë një sipërfaqe të konsiderueshme në fshatin Drojë të Kurbinit, duke shkaktuar dëme në bimësi dhe në pasuri private. Zjarri ka nisur fillimisht në një zonë me shkurre dhe ferra, për t'u përhapur më pas në një masiv pyjor privat. Si pasojë e flakëve janë djegur disa koshere bletësh.
Situata paraqitet e vështirë pasi vatra e zjarrit është shtrirë pranë banesave të zonës, duke shkaktuar rrezik për këto objekte. Forcat zjarrfikëse të Kurbinit kanë mbërritur menjëherë në vendngjarje pas njoftimit për situatën.
Aktualisht, efektivët po vijojnë punën në terren për izolimin dhe shuarjen e plotë të flakëve, si dhe për parandalimin e përhapjes së tyre drejt banesave. Shkaqet e rënies së zjarrit dhe dëmet totale pritet të përcaktohen pas verifikimeve përfundimtare nga autoritetet përkatëse.
Përditësime
Forcat zjarrfikëse të Kurbinit kanë vënë nën kontroll vatrën e zjarrit në fshatin Drojë. Operacioni për izolimin e flakëve ka përfunduar me sukses, duke eliminuar rrezikun për banesat e zonës.