Paraditen e sotme, në qytetin e Gjirokastrës, është regjistruar një zjarr në mjediset pranë Pazarit. Flakët kanë përfshirë fasadën e godinës ku ndodhet Posta Shqiptare, duke u përqendruar në zonën e tabelave reklamuese.
Sipas raportimeve, zjarri ka krijuar rrezik për ndërtesën e Postës Shqiptare, si dhe për banesat që ndodhen në të njëjtin objekt. Menjëherë pas njoftimit, forcat zjarrfikëse kanë mbërritur në vendngjarje dhe kanë kryer ndërhyrjen për shuarjen e zjarrit. Falë reagimit të shpejtë, situata është vënë nën kontroll dhe flakët janë izoluar plotësisht. Autoritetet konfirmojnë se nuk ka pasur pasoja për banorët dhe as dëme të tjera materiale në godinë.
Përditësime
Hetuesit e Policisë së Shtetit kanë përcaktuar se një shkëndijë elektrike në një tabelë reklamuese është shkaku i zjarrit në godinën e Postës Shqiptare në Gjirokastër. Për të siguruar ndërhyrjen e forcave zjarrfikëse dhe mbrojtur qytetarët, OSHEE ka ndërprerë përkohësisht furnizimin me energji elektrike në qytet.