Një zjarr ka rënë ditën e sotme në katin e gjashtë të hotel Radisson në kryeqytet, duke shkaktuar panik të përkohshëm mes klientëve dhe personelit. Ngjarja ka mobilizuar shërbimet e emergjencës dhe forcat zjarrfikëse, të cilat kanë mbërritur menjëherë në vendngjarje për të neutralizuar vatrën.
Sipas të dhënave paraprake, flakët dyshohet të jenë shkaktuar nga një defekt elektrik në njërën prej pajisjeve të sistemit të kondicionimit. Ndërhyrja e menjëhershme e zjarrfikësve bëri të mundur izolimin e vatrës dhe parandalimin e përhapjes së zjarrit në ambiente të tjera të godinës.
Nga ngjarja nuk raportohet për persona të lënduar apo të asfiksuar nga tymi. Situata është vënë shpejt nën kontroll dhe autoritetet po vijojnë verifikimet për të përcaktuar rrethanat e plota të ngjarjes.