Një vatër zjarri ka shpërthyer ditën e sotme në kodrat e fshatit Babicë në Vlorë. Përhapja e shpejtë e flakëve është favorizuar nga temperaturat e larta dhe erërat e forta, të cilat i kanë shtyrë ato drejt zonave të banuara.
Zjarri ka rrezikuar disa banesa të zonës, ndërsa ka përfshirë sipërfaqe të konsiderueshme me shkurre, pemtari dhe ullishte, duke shkaktuar djegien e disa rrënjëve të ullirit. Forcat e Shërbimit Zjarrfikës të Vlorës kanë mbërritur menjëherë në vendngjarje për të marrë situatën nën kontroll.
Pas rreth një ore pune intensive, zjarrfikësit kanë arritur të izolojnë dhe të shuajnë plotësisht flakët, duke parandaluar dëmtimin e banesave. Sipas të dhënave zyrtare, nuk raportohet për persona të lënduar, ndërsa dëmet materiale janë kufizuar vetëm në bimësinë e zonës.