Një zjarr ka shpërthyer pasditen e sotme në lagjen Emshir të Prishtinës, konkretisht në rrugën “Fatime Sokoli”, në afërsi të Stacionit të Autobusëve. Ngjarja është raportuar rreth orës 16:00.
Disa media, si Gazeta Metro dhe Klan Kosova, raportojnë se flakët kanë përfshirë një deponi gomash në këtë zonë. Për të garantuar sigurinë e qytetarëve, autoritetet policore kanë ndërmarrë masën e evakuimit të banorëve që ndodhen pranë vendit ku ka rënë zjarri.
Zëdhënësi i Policisë së Kosovës për rajonin e Prishtinës, Enis Pllana, ka konfirmuar se menjëherë pas marrjes së njoftimit, në terren kanë dalë njësitet policore dhe ekipet e zjarrfikësve. "Për shkaqe sigurie është bërë evakuimi i banorëve të zonës, ndërsa zjarrfikësit janë duke ndërmarrë veprimet e nevojshme për lokalizimin dhe shuarjen e zjarrit", deklaroi Pllana.
Aktualisht, ekipet e shpëtimit janë duke punuar për vënien nën kontroll të flakëve. Deri në këto momente nuk ka informacione të konfirmuara për persona të lënduar apo për shkaqet që çuan në shpërthimin e zjarrit. Policia dhe ekipet emergjente vijojnë të qëndrojnë në vendin e ngjarjes për të vlerësuar situatën dhe dëmet materiale.