Një zjarr i përmasave të mëdha ka rënë mëngjesin e sotëm në një ndërtesë banimi në rrugën “Isa Kastrati” në Prishtinë. Flakët kanë përfshirë katin e sipërm të objektit, ndërsa re të dendura tymi janë vërejtur nga pjesë të ndryshme të kryeqytetit.
Zëdhënësja e Policisë së Kosovës për rajonin e Prishtinës, Flora Ahmeti, ka konfirmuar se informata për këtë incident është pranuar rreth orës 07:30. Sipas të dhënave paraprake, tre persona kanë pranuar trajtim mjekësor si pasojë e zjarrit.
Në vendin e ngjarjes kanë dalë menjëherë ekipet e zjarrfikësve, të cilët po punojnë për shuarjen e flakëve. Për arsye sigurie, policia ka krijuar një perimetër sigurie rreth ndërtesës dhe ka bllokuar qarkullimin në afërsi të zonës së prekur. Autoritetet janë duke u marrë me zbardhjen e plotë të rrethanave të incidentit.
Përditësime
Siç shihet nga pamjet në vendngjarje, flakët kanë depërtuar kulmin e një banese në Prishtinë. Në vendin e ngjarjes kanë dalë Zjarrfikësit, Policia e Kosovës dhe ekipet e Emergjencës Mjekësore për t'u ofruar ndihmë tre personave të prekur.