Zjarri në malin e Shëngjinit ka përfshirë një sipërfaqe të konsiderueshme me shkurre dhe bimësi të thatë, ndërsa era e fortë po favorizon përhapjen e flakëve. Terreni i thyer po pengon ndërhyrjen e shpejtë të forcave zjarrfikëse, të cilat po punojnë për të shmangur rrezikun ndaj zonave të banuara dhe rrugëve kryesore.
Specialisti i Drejtorisë së Përgjithshme të Shërbimit Zjarrfikës, Agustin Pepkolaj, ka konfirmuar se situata mbetet e vështirë për shkak të konfiguracionit të terrenit. Megjithatë, autoritetet bëjnë të ditur se flakët nuk paraqesin kërcënim të drejtpërdrejtë për banesat, ndërsa operacioni po koordinohet nga strukturat e Mbrojtjes Civile.
Gjatë operacionit është regjistruar një shpërthim brenda vatrës së zjarrit, i cili ka shkaktuar shkëputjen e një guri. Ky i fundit ka goditur një automjet që po udhëtonte në drejtim të Shëngjinit, duke shkaktuar plagosjen e një të riu, i cili u transportua për në Spitalin e Lezhës për të marrë ndihmën e nevojshme mjekësore. Në terren janë angazhuar 6 mjete zjarrfikëse nga bashkitë Lezhë dhe Vau i Dejës, ndërsa puna vijon për neutralizimin e plotë të vatrës.
Përditësime
Ekipet e zjarrfikësve janë përqendruar pranë bizneseve buzë rrugës, ku po përdorin automjete mbrojtëse për të shmangur përhapjen e flakëve. Agustin Pepkolaj deklaroi se strategjia përqendrohet në izolimin e vatrës së zjarrit dhe garantimin e sigurisë së zonës tregtare.