Një zjarr ka rënë mesditën e sotme në katin e gjashtë të një pallati në kompleksin Kika 1, në zonën e Komunës së Parisit në Tiranë.
Forcat zjarrfikëse kanë ndërhyrë menjëherë në vendngjarje dhe kanë punuar për izolimin dhe shuarjen e flakëve. Pas ndërhyrjes së tyre, zjarri është vënë nën kontroll, por punimet vazhdojnë për shuarjen e plotë të vatrës dhe për të parandaluar riaktivizimin.
Banorët e pallatit janë evakuuar nga shërbimet zjarrfikëse. Gazetarja Xhensila Kodra raportoi se nuk ka të lënduar nga ngjarja.
Si pasojë e zjarrit janë shkaktuar vetëm dëme materiale në apartament. Autoritetet dyshojnë se shkak mund të ketë qenë një shkëndijë elektrike, por hetimet vijojnë për zbardhjen e plotë të shkaqeve.