Një apartament në katin e 8-të të një pallati në lagjen Pavarësia, pranë zonës së ish-Kombinatit në Vlorë, është përfshirë nga flakët gjatë orëve të para të mëngjesit të sotëm. Ngjarja ka ndodhur rreth orës 01:00, duke vënë në lëvizje shërbimet zjarrfikëse.
Operacioni për shuarjen e zjarrit ka rezultuar i vështirë për shkak të lartësisë së katit ku ndodhej banesa. Zjarrfikësit kanë punuar për disa orë, me objektiv kryesor izolimin e flakëve dhe parandalimin e përhapjes së tyre në apartamentet e tjera të pallatit.
Sipas informacioneve zyrtare, nuk raportohen persona të lënduar, por dëmet materiale brenda apartamentit janë të konsiderueshme. Autoritetet kanë nisur hetimet për të përcaktuar shkaqet dhe rrethanat e plota të këtij incidenti.