Një zjarr u regjistrua në një pallat shumëkatësh në lagjen Xhevdet Nepravishta të Lushnjës, pranë spitalit.
Banorët konstatuan tymin dhe njoftuan menjëherë shërbimin zjarrfikës. Ndërhyrja e shpejtë e zjarrfikësve të Lushnjës bëri të mundur izolimin e flakëve në një apartament në katin e tretë, duke shmangur përhapjen në banesat e tjera.
Policia mbërriti në vendngjarje dhe nisi hetimet për shkaqet e ngjarjes. Sipas informacioneve paraprake nga burime policore, dyshohet se pronari i banesës, një 40-vjeçar, i ka vënë flakën apartamentit në disa vende dhe më pas është larguar.
Ai dyshohet të ketë probleme të shëndetit mendor. Forcat e policisë po vazhdojnë kërkimet për lokalizimin dhe kapjen e tij, ndërsa hetimet po zhvillohen për zbardhjen e plotë të rrethanave.