Një zjarr ka përfshirë një sipërfaqe të mbjellë me ullinj në fshatin Trevllazër, pjesë e Njësisë Administrative Novoselë. Vatra e zjarrit mbetet ende aktive, ndërsa forcat zjarrfikëse janë angazhuar në terren për të vënë situatën nën kontroll.
Sipas raportimeve, ndërhyrja e zjarrfikësve po përballet me vështirësi të konsiderueshme për shkak të erës së fortë, e cila favorizon përhapjen e flakëve në pemëtari. Si pasojë, janë dëmtuar disa ullinj në këtë zonë, e cila është e njohur për kultivimin e ullinjve shekullorë. Ky nuk është një rast i izoluar për këtë fshat, pasi zona është përballur edhe më parë me incidente të ngjashme që kanë prekur sipërfaqet me ullishte.
Aktualisht, operacioni për neutralizimin e plotë të vatrës së zjarrit vijon, me synim parandalimin e përhapjes së mëtejshme në zonat përreth.