Gjatë pasdites së kësaj të shtune, një zjarr ka përfshirë fshatin Dëllënjë, në Njësinë Administrative Novoselë të Bashkisë Vlorë. Flakët janë përhapur në sipërfaqe të mbjella me ullishte dhe pemëtore, duke shkaktuar shqetësim për dëmtimin e bimësisë.
Në përpjekje për vënien nën kontroll të situatës, janë dislokuar 2 automjete të shërbimit zjarrfikës dhe 8 efektivë. Sipas informacioneve të bëra të ditura nga terreni, puna e grupeve të gatshme po has vështirësi për shkak të kushteve atmosferike, konkretisht temperaturave të larta dhe erës së fortë, të cilat ndikojnë në përhapjen më të shpejtë të flakëve.
Sipas raportimeve të deritanishme nga shërbimi zjarrfikës, banesat në zonë nuk paraqiten të rrezikuara, pasi ndodhen në një distancë të konsiderueshme nga vatra e zjarrit. Ende nuk janë përcaktuar shkaqet që kanë çuar në rënien e këtij zjarri, ndërsa autoritetet përkatëse pritet të kryejnë verifikimet e nevojshme për zbardhjen e ngjarjes dhe përcaktimin e rrethanave të plota.