Pasditen e kësaj të hëne, një zjarr përfshiu një sipërfaqe me shkurre dhe bimësi të ulët në zonën e Ujit të Ftohtë, mbi tunelin e Vlorës. Flakët u përhapën me shpejtësi, të ndikuara nga temperaturat e larta dhe era, duke iu afruar zonave të banuara dhe duke krijuar rrezik për banesat.
Menjëherë pas alarmit, në vendngjarje mbërritën forcat e Policisë dhe shërbimet zjarrfikëse. Ndërhyrja e shpejtë e strukturave operacionale bëri të mundur izolimin e vatrës së zjarrit dhe frenimin e përhapjes së flakëve drejt zonës së banuar.
Aktualisht, operacioni për shuarjen e plotë të zjarrit vijon. Autoritetet dhe zjarrfikësit mbeten në terren për të monitoruar situatën, për të parandaluar riaktivizimin e vatrave dhe për të eliminuar çdo rrezik të mundshëm për banorët dhe pronat e tyre.