Gjatë mesditës së 11 gushtit 2026, një vatër zjarri u regjistrua në zonën e Ujit të Ftohtë në qytetin e Vlorës, pranë tunelit. Flakët kanë përfshirë një kabinë të ujësjellësit që shërben për furnizimin dhe shpërndarjen e ujit në këtë pjesë të qytetit.
Sipas të dhënave paraprake, zjarri dyshohet se ka nisur fillimisht në një pjesë kodrinore dhe më pas, i favorizuar nga bimësia, është përhapur drejt kabinës. Ndërhyrja e shpejtë e shërbimeve zjarrfikëse ka qenë vendimtare për të penguar përhapjen e mëtejshme të flakëve.
Situata paraqet rrezik për zonat e banuara, hotelet dhe objektet turistike përreth vatrës së zjarrit. Ekipet zjarrfikëse vijojnë punën në terren për të izoluar plotësisht vatrën dhe për të shmangur riaktivizimin e saj. Autoritetet nuk kanë përcaktuar ende shkaqet e sakta të rënies së zjarrit dhe pritet që ato të zbardhen pas verifikimeve në vendin e ngjarjes.