Situata në fshatin Akërni të Vlorës paraqitet problematike pas rënies së një zjarri, i cili ka përfshirë një sipërfaqe të konsiderueshme toke. Flakët, të favorizuara nga era e fortë dhe bimësia e thatë, kanë shkaktuar djegien e disa stanëve në zonë. Megjithatë, raportohet se bagëtia ka shpëtuar pa dëme.
Forcat zjarrfikëse janë angazhuar në terren për të vënë situatën nën kontroll dhe për të penguar përhapjen e mëtejshme të flakëve drejt perimetrit të aeroportit të Vlorës dhe zonave të banuara. Banorët kanë kërkuar ndërhyrje urgjente, duke shprehur shqetësimin se flakët mund të kërcënojnë infrastrukturën e rëndësishme dhe shtëpitë e tyre.
Në lidhje me shkaqet e ngjarjes, autoritetet nuk kanë dalë ende me një version zyrtar, ndërsa situata vijon të mbetet në vëmendjen e grupeve të gatshme të shërbimit zjarrfikës.
Përditësime
Autoritetet po hetojnë pistën e piromanisë lidhur me zjarrin në Akërni, pasi provat sugjerojnë se flakët kanë nisur nga zona e Bishanit. Situata në Vlorë është përkeqësuar pas raportimeve për vatra të reja në malin e Shashicës dhe fshatin Delisuf.