Një situatë e vështirë është krijuar në disa rajone të Francës për shkak të shpërthimit të zjarreve masive. Në departamentin e Landes, autoritetet po përballen me vatra të rënda, ku përpjekjet e zjarrfikësve po vështirësohen nga erërat e forta dhe ndryshimi i vazhdueshëm i drejtimit të tyre. Prefektura e Landes raporton se situata është e pafavorshme, ndërsa qindra zjarrfikës janë angazhuar në terren për të vënë flakët nën kontroll. Si masë sigurie, qindra banorë janë larguar nga banesat e tyre.
Përveç departamentit të Landes, vatra zjarri janë raportuar edhe në zona të tjera të vendit:
- Në Gerand, rreth 2.000 kampistë janë evakuuar si masë parandaluese.
- Në jug të Rennes, një vatër zjarri ka përfshirë rreth 2.250 hektarë.
- Në komunën e Saint-Just (Ille-et-Vilaine), janë angazhuar mbi 300 zjarrfikës.
Sipas shërbimit meteorologjik francez, Meteo-France, vendi po përballet me një valë të nxehti që ka çuar temperaturat nga 38 deri në 40 gradë Celsius. Për këtë arsye, autoritetet kanë vendosur katër departamente (Indre, Indre-et-Loire, Mayenne dhe Deux-Sevres) nën alarmin e kuq për rrezik "shumë të lartë" nga zjarret, ndërsa 57 departamente të tjera janë nën alarm portokalli. Gjithashtu, 75 departamente janë në alarm portokalli për shkak të temperaturave të larta.
Përditësime
Situata në rajonin e Landes është përkeqësuar ndjeshëm, ku flakët kanë përfshirë tashmë 4 mijë hektarë tokë. Erërat e forta dhe ndryshimi i drejtimit të tyre kanë vështirësuar operacionet e shuarjes, duke detyruar evakuimin e mbi 400 banorëve. Zjarrfikësit janë përqendruar në komunën e Luglonit për të vënë situatën nën kontroll. Ndërkohë, autoritetet raportojnë për vatra të reja zjarri në Pas-de-Calais, në afërsi të një zone turistike.