Situata në deponinë e mbeturinave në Sferkë mbetet e rënduar, ku si pasojë e tymit dhe gazrave nga djegia, disa persona kanë kërkuar ndihmë mjekësore. Sipas zëdhënësit të Prokurorisë Themelore në Pejë, Shkodran Nikçi, një person është dërguar për trajtim në Spitalin Rajonal të Pejës, ndërsa të tjerët janë trajtuar në vendngjarje nga ekipet emergjente.
Prokurori i Shtetit ka kërkuar angazhimin e shtuar të forcave të zjarrfikësve për lokalizimin e flakëve, ndërsa vazhdojnë hetimet për përcaktimin e shkaqeve të zjarrit. Prokuroria ka angazhuar një ekspert për të vlerësuar nëse incidenti ka ardhur si pasojë e faktorit njerëzor, rast në të cilin do të ndërmerren masa ligjore ndaj përgjegjësve.
Reagimet institucionale
Deputetja e zgjedhur e LDK-së, Hykmete Bajrami, ka kërkuar ndërhyrjen e kryeministrit në detyrë, Albin Kurti, për koordinimin e kapaciteteve shtetërore, duke përfshirë Forcën e Sigurisë së Kosovës dhe agjencitë e emergjencave. Ajo ka akuzuar institucionet për neglizhencë dhe ka njoftuar dorëzimin e një kallëzimi penal në Prokurori.
Nga ana tjetër, Kompania për Menaxhimin e Deponive në Kosovë (KMDK) ka sqaruar se deponia në fjalë nuk ndodhet aktualisht nën menaxhimin e saj. Për shkak të protestave dhe bllokimit të rrugëve, është ndërprerë shkarkimi i mbeturinave, duke prekur shërbimet për rreth 220 mijë banorë të komunave Pejë, Klinë, Istog, Deçan dhe Junik.