Vatra e zjarrit në fshatin Riban ka marrë përmasa të mëdha, duke u përhapur me shpejtësi drejt zonave pyjore dhe duke rrezikuar banesat për shkak të erës së fortë. Autoritetet në terren po punojnë në dy drejtime kryesore, në Riban dhe Lofkënd, për të frenuar avancimin e flakëve që kanë përfshirë kurorën e pishave.
Në operacionin e shuarjes janë angazhuar burime të konsiderueshme:
• 5 mjete zjarrfikëse nga Mallakastra, Fieri, Roskoveci, Berati dhe Kuçova;
• 30 efektivë të shërbimit zjarrfikës dhe 35 punonjës të bashkisë;
• 2 autobotë me ujë;
• 35-40 trupa të Forcave të Armatosura.
Sipas autoriteteve, ndërhyrja vetëm me forca tokësore është vlerësuar si e pamjaftueshme për shkak të terrenit të vështirë, lartësisë së bimësisë dhe intensitetit të lartë të flakëve. Për rrjedhojë, ka nisur ndërhyrja me helikopter për hedhjen e ujit mbi vatrat aktive. Policia ka dyshime se zjarri mund të ketë qenë i qëllimshëm dhe ka nisur hetimet, ndërsa disa persona janë shoqëruar për ngjarjen, e cila solli edhe evakuimin e disa familjeve një ditë më parë.
Përditësime
Kryetari i Bashkisë Mallakastër, Qerim Ismailaj, konfirmoi nisjen e ndërhyrjes nga ajri për shuarjen e vatrave aktive në Riban. Operacioni është përforcuar me trupa nga garnizonet e Forcave të Armatosura në Vlorë dhe Berat, si dhe me forca zjarrfikëse nga Patosi. Situata mbetet kritike, pasi era favorizon përhapjen e flakëve drejt fshatit Ngraçan.
Situata në zonën e Ribanit, Mallakastër, është përkeqësuar gjatë pasdites. Flakët kanë dalë jashtë kontrollit, duke kapërcyer rrugën e Panahorit dhe po përhapen me shpejtësi drejt fshatrave Drenie dhe Ngraçan. Zjarri ka përfshirë sipërfaqe të konsiderueshme pyjore, duke e bërë situatën operacionale kritike dhe duke e bërë të domosdoshme ndërhyrjen nga ajri.