Në kuadër të procesit gjyqësor ndaj ish-krerëve të Ushtrisë Çlirimtare të Kosovës (UÇK), Prokuroria e Specializuar ka parashtruar pretendimet e saj mbi funksionimin e shërbimeve të inteligjencës dhe policisë gjatë luftës dhe periudhës së Qeverisë së Përkohshme të Kosovës. Sipas dosjes, nevoja për një shërbim të tillë u identifikua që në pranverën e vitit 1998.
Sipas pretendimeve të Prokurorisë, Kadri Veseli ishte në krye të Drejtorisë së Inteligjencës, strukturë e themeluar në vitin 1998. Në gusht të atij viti, thuhet se Veseli mbikëqyri trajnimin e një grupi prej rreth 20 personash, të cilët përbënë bërthamën e shërbimit. Ky rol u rikonfirmua zyrtarisht nga Shtabi i Përgjithshëm gjatë procesit të ristrukturimit në nëntor të vitit 1998.
Prokuroria pretendon se ekzistonte një rregullore e shpërndarë në zonat operative, e cila autorizonte zbulimin e personave të konsideruar si të rëndësishëm për armikun, duke u dhënë kompetenca për arrestimin ose vrasjen e tyre. Në dosje specifikohet se, për Zonën e Drenicës, njësia e inteligjencës përbëhej nga Sabit Geci dhe Ismet Haxha, të cilët raportonin drejtpërdrejt te Veseli.
Sipas Prokurorisë, raportet e inteligjencës përpiloheshin në nivel zone nga shefi përkatës dhe përcilleshin te komandantët e zonave dhe Shtabi i Përgjithshëm. Për Sabit Gecin, Prokuroria pretendon se ai e ushtroi këtë rol edhe gjatë vitit 1999 në Shqipëri, periudhë gjatë së cilës pretendohet se është përfshirë në krime të tjera.