Albin Kurti, kryeministër i Republikës së Kosovës, vizitoi të premten Agjencinë e Kosovës për Inteligjencë (AKI) me rastin e 18-vjetorit të Pavarësisë dhe 17-vjetorit të themelimit të këtij institucioni.
Gjatë vizitës, Kurti u prit nga drejtori Petrit Ajeti, stafi drejtues dhe zyrtarë të tjerë. Me këtë rast u ndanë certifikata për zyrtarët e rinj dhe u përurua një objekt modern në kompleksin e AKI-së.
Kurti theksoi se inteligjenca mbetet një nga hallkat më të rëndësishme në mbrojtjen e sovranitetit, duke garantuar përgatitjen për çdo sfidë dhe vendime të informuara. Ai bëri të ditur se AKI ka pasur mbështetjen e vazhdueshme të Qeverisë me rritje të lartë të buxhetit dhe kjo përkrahje do të vazhdojë.
Sipas tij, AKI po avancon vazhdimisht kapacitetet teknologjike, analitike dhe operative, me ambicie dhe objektiva të qarta. Agjencia po përshtatet me realitetin e ri të sigurisë dhe po forcon bashkëpunimin me institucionet vendore si dhe partnerët ndërkombëtarë.
Kurti vlerësoi se sukseset e AKI-së përgjatë viteve të fundit kanë kontribuar në sigurinë kombëtare, rajonale dhe më gjerë. Kërcënimet nga spiunazhi, ato hibride dhe kibernetike, ekstremizmi, radikalizmi, krimi i organizuar dhe format e tjera janë trajtuar me profesionalizëm, duke ndikuar në avancimin e sigurisë kombëtare.