Shaban Neziri, ushtrues detyre i kryeshefit ekzekutiv të KOSTT-it, priti të enjten drejtorin e Agjencisë së Kosovës për Inteligjencë (AKI), Petrit Ajeti.
Gjatë takimit u diskutua rëndësia strategjike e sektorit energjetik, roli i KOSTT-it në mbrojtjen e infrastrukturës kritike, planet zhvillimore si dhe çështjet e sigurisë shtetërore që lidhen me funksionimin e qëndrueshëm të sistemit elektroenergjetik.
KOSTT-i prezantoi punën, masat dhe kapacitetet për të siguruar stabilitetin dhe besueshmërinë e rrjetit. Takimi u zhvillua në kuadër të bashkëpunimit institucional për identifikimin dhe adresimin e rreziqeve ndaj sigurisë së Kosovës, me fokus te kërcënimet ndaj infrastrukturës kritike.
U theksua rëndësia e parandalimit dhe trajtimit të rreziqeve të sabotimit dhe cenimeve të sigurisë në sistemin elektroenergjetik. KOSTT-i vlerëson bashkëpunimin ndërinstitucional si thelbësor për shkëmbimin e informacioneve, koordinimin e masave parandaluese dhe forcimin e mekanizmave mbrojtës.
Vizita shihet si dëshmi e angazhimit të përbashkët për forcimin e sigurisë dhe qëndrueshmërisë së infrastrukturës energjetike në Republikën e Kosovës.