Kryeprokurori i Shtetit, Zejnulla Gashi, ka pritur në takim zyrtar drejtorin e Administratës Tatimore të Kosovës (ATK), Mentor Hyseni. Takimi u përqendrua në koordinimin ndërinstitucional dhe avancimin e bashkëpunimit në luftën kundër kriminalitetit financiar.
Drejtori Hyseni uroi fillimisht Zejnulla Gashin për marrjen e detyrës si Kryeprokuror i Shtetit. Në vijim, palët diskutuan për mekanizmat që rrisin efikasitetin në luftimin e dukurive të dëmshme si pastrimi i parave, evazioni fiskal dhe forma të tjera të krimit ekonomik, me qëllim forcimin e sundimit të ligjit në Republikën e Kosovës.
Një pjesë qendrore e takimit iu kushtua zbatimit më proaktiv të memorandumit të bashkëpunimit midis Zyrës së Kryeprokurorit të Shtetit dhe ATK-së. Ky dokument mundëson ndarjen e informacioneve në kuadër të platformës për hetime penale të bazuara në të dhëna inteligjente. Përdorimi më intensiv i kësaj platforme pritet të rrisë ndjeshëm suksesin në procedimet penale kundër veprave që ndërlidhen me korrupsionin, pastrimin e parave dhe krimin e organizuar.