Në hapjen e Konferencës së IX-të të Ambasadorëve të Republikës së Kosovës, drejtori i Agjencisë së Kosovës për Inteligjencë (AKI), Petrit Ajeti, ka mbajtur një prezantim mbi gjendjen e sigurisë. Sesioni i parë i këtij aktiviteti, i organizuar nga Ministria e Punëve të Jashtme dhe Diasporës, është fokusuar në temën “Siguria, qëndrueshmëria dhe kërcënimet hibride”.
Në fjalën e tij, Ajeti ka trajtuar sfidat aktuale të sigurisë dhe nevojën për të forcuar qëndrueshmërinë institucionale dhe shoqërore përballë rreziqeve hibride. Në konferencë po marrin pjesë krerë të institucioneve të vendit, ambasadorë dhe drejtues të misioneve diplomatike të Republikës së Kosovës.
Konferenca e cila po zhvillohet nën temën “Kosova në një botë në ndryshim: Siguri, Partneritet dhe Zhvillim”, do të vazhdojë punimet e saj për tri ditë në total. Gjatë kësaj periudhe, pjesëmarrësit do të diskutojnë mbi prioritetet e politikës së jashtme, sfidat ndërkombëtare dhe mënyrat për avancimin e interesave shtetërore të Republikës së Kosovës në arenën globale.