Tre operatorët energjetikë KEDS, KESCO dhe KOSTT kanë kërkuar rritje të tarifave të energjisë elektrike rreth një muaj më parë në ZRRE – Zyra e Rregullatorit të Energjisë Elektrike në Kosovë.
Kërkesat janë ende në shqyrtim. ZRRE njofton se vlerësimi kryhet nga ekspertët përmes analizës së detajuar teknike dhe financiare, në përputhje me kornizën ligjore dhe rregullative në fuqi. Pas përfundimit, raportet përkatëse dhe propozimet tarifore do të publikohen dhe do t’i nënshtrohen procedurave të mëtejme, përfshirë konsultimin publik, para vendimit përfundimtar.
Mendimi i ekspertit
Eksperti i energjetikës Adhurim Haxhimusa vlerëson se ZRRE nuk ka rrugëdalje tjetër përpos të ngrejë tarifat e energjisë elektrike për konsumatorët në Republikën e Kosovës. Ai e lidh nevojën me telashet në prodhimin e energjisë nga KEK. Sipas tij, rritja e kostos në 2025 vjen nga renovimi i një blloku të termocentralit Kosova B, që ka qenë jashtë funksionit dhe ka detyruar importime më të mëdha të energjisë elektrike.
Reagimi i shoqërisë civile
Grupi “Asnjë cent më shumë” pret gjithashtu rritje tarifash dhe paralajmëron kundërshtime. Koordinatori Luan Hasanaj deklaroi se janë në diskutime për masa si protesta dhe aktivitete të tjera, për shkak të pasojave të mëdha për njerëzit dhe bizneset.