Zyra e Rregullatorit për Energji (ZRrE) bëri të ditur se tarifat e energjisë elektrike mbeten të pandryshuara deri në vendimin përfundimtar. Kjo u deklarua në prag të datës 1 prill, kur zakonisht shqyrtohen dhe caktohen tarifat e reja, ndërkohë që jemi vetëm dy ditë para saj.
Janë bërë dy muaj që kur tre operatorët kryesorë të sektorit energjetik, KEDS, KESCO dhe KOSTT, kanë dorëzuar kërkesat për rritjen e tarifave në ZRrE. Këto kompani kërkojnë një rritje prej mbi 20%.
Kryetari i Bordit të ZRrE-së, Ymer Fejzullahu, shpjegoi se tarifat aktuale do të vazhdojnë të jenë në fuqi deri në përfundim të procesit të konsultimit publik. Ai theksoi se ende nuk ka vendim, pasi pritet publikimi i raportit të stafit gjatë kësaj jave.
"Po presim gjatë javës për të publikuar raportet. Tani janë dy javë diskutim publik, pastaj mund të nxjerrim qëndrimin", tha Fejzullahu. Pas raportit, do të ketë 14 ditë për komente nga palët e interesuara, pas të cilave merret vendimi përfundimtar.
Ai ritheksoi se tarifat ekzistuese mbeten në fuqi edhe pas 1 prillit, pasi procesi është ende në shqyrtim nga departamentet. KESCO e arsyetoi kërkesën me rritjen e kostove operative dhe nevojën për furnizim të qëndrueshëm me energji elektrike për vitin 2026.